Даваа гарагт И Цай мэдээллийн группээс мэдээлснээр, БНХАУ-аас Европ руу экспортлох халаагуурын төхөөрөмжийн тоо энэ жил эрчимтэй өсжээ. Халаагуурын төхөөрөмжийн экспорт тийн нэмэгдэх болсон нь Европ тивд ОХУ, Украины дайнаас улбаатай эрчим хүчний хямрал тохиож байгаатай холбоотой юм.
Европын Холбооны статистикийн хорооноос гаргасан судалгаанаас үзэхэд долоодугаар сард Европ тив дэх эрчим хүчний инфляц 38.3 хувьд хүрсэн байна. Улмаар тус тивд байгалийн хийн үнэ даруй 52.2 хувиар өссөн бол цахилгаан эрчим хүчний үнэ 31.1 хувиар өсжээ. Наймдугаар сар гарсаар Европ тивд эрчим хүчний үнэ үргэлжлүүлэн өссөн бөгөөд Европын эрчим хүчний арилжааны газраас цуглуулсан дата мэдээллээс үзвэл Европт нэг мегаватт цаг эрчим хүчний дундаж үнэ 462.1 еврод хүрсэн байна. Энэ нь 2022 оны эхэн үетэй харьцуулахад даруй 6 дахин өссөн үзүүлэлт юм.
Хятадын Европ руу экспортолж буй халаагуурын төхөөрөмжид агаар чийгшүүлэгч, цахилгаан ус халаагуур, цахилгаан халаагуур, цахилгаан хөнжил, үсний сэнс зэрэг багтсан бөгөөд үүнээс цахилгаан халаагуур, цахилгаан хөнжлийн экспорт бүр ч ихээр өссөн байна. Тодруулбал, БНХАУ-ын Европ руу экспортолсон цахилгаан хөнжлийн хэмжээ өнгөрөгч онтой харьцуулахад 97 хувиар өсжээ.
Эх сурвалж: China Daily