Москва олон талын хоригт орсны улмаас цэрэг, армидаа нийлүүлэх зэвсэг хангамжийн асуудалтай тулгарч байна. Улмаар Хойд Солонгосоос цэргийн техник хэрэгсэл худалдаж авахаас өөр аргагүй байдалд орсон гэж АНУ-ын хэвлэлүүд мэдээлж байна.

Тухайлбал, нууцын зэрэглэлээс гарсан тагнуулын мэдээллээс харахад Орос улс Пхеньянаас их бууны сум, пуужин олон сая ширхгээр худалдан авч байна хэмээн New York Times нийтэлжээ. Дайн сунжрах шинжтэй болсон тул ийнхүү олон тооны зэвсэг авах гэрээ байгуулахаас өөр гарцгүй болсон гэж АНУ-ын төрийн албаны нэрээ нууцлахыг хүссэн хүн BBC агентлагт хэлсэн байна. Хойд Солонгосоос дэмжлэг хүссэн нь ОХУ нийлүүлэлтийн ноцтой хомсдолд орж буйн илрэл боллоо.

Ким Жон Уны дэглэм нь Украины дайнд АНУ-ыг буруутгаж байгаа юм. Улмаар өнгөрсөн сард Украинаас салан тусгаарлагч Бүгд Найрамдах Донецк, Луханск улсуудын тусгаар тогтнолыг хүлээн зөвшөөрсөн билээ. Тэрчлэн, Москватай "нөхөрлөл, найрамдалт харилцаагаа гүнзгийрүүлнэ” хэмээн амласан юм.

ОХУ нь Иранд захиалсан дронуудаа өнгөрсөн долоо хоногт хүлээн авсан. Мөн Иранд очин тэдгээр Mohajer-6 болон Shahed цуврал зэвсгийн сургалтад хамрагдсан гэх мэдээлэл байна. Ираны зүгээс дайтагч талуудын алинд ч ямар нэг зэвсэг нийлүүлээгүй гэж албан ёсоор няцаалт хийж байгаа юм. Харин АНУ Ираныг хэдэн зуун байлдааны дрон нийлүүлэх тохиролцоо хийсэн гэж мэдэгдсэн хэвээр байна. Улмаар Иран, Хойд Солонгос хоёул барууны орнуудын томоохон хориг арга хэмжээний бай болж буй.

Эх сурвалж: BBC