Нидерланд улсын Хаарлем гэх хот хоол хүнсний бүтээгдэхүүний уур амьсгалын өөрчлөлтөд оруулж буй хувь нэмрийг харгалзан үзээд нийтийн эзэмшлийн бүсэд мах, махан бүтээгдэхүүний сурталчилгаа байршуулах, тоглуулахыг хориглох болжээ.
Улмаар хориг 2024 оноос эхлэн хэрэгжих бөгөөд тухайн хугацаанд өөр нэг хот ийм шийдвэр гаргахгүй болбоос уг төрлийн сурталчилгааг олон нийтийн эзэмшлийн бүсэд хориглосон дэлхийн анхны хот Хаарлем болох юм.
Мах, махан бүтээгдэхүүний сурталчилгааг хориглох хуулийн төслийг Нидерландын ГрюнЛинкс гэх нам санаачилсан байна. НҮБ-аас гаргасан судалгаагаар хүний гараар бий болсон хүлэмжийн хийн 14 хувийг мал сүрэг ялгаруулдаг гэсэн юм. Тиймээс тус намын зүгээс махыг хүрээлэн буй орчинд хортой гэж үзэхдээ уг төслийг санаачилжээ.
Ташрамд дурдахад Нидерланд улсын нийт хүн амын 95 хувь нь мах иддэг бол тэдний тал гаруй хувь нь махыг өдөр бүр идээд байдаггүй гэнэ.
Эх сурвалж: BBC