Мьянмар улс дахь олон улсын компаниуд ам.долларын хомсдолд орох болжээ. Харамсалтай нь тус улсын засгийн газраас гадаад валютын хяналтыг тогтвортой хянаж чадахгүй байгаа нь нөхцөл байдлыг улам дордуулж, тус улсад үйл ажиллагаа явуулж буй бизнесийн байгууллагуудыг хүндхэн нөхцөлд оруулж байгаа юм.

Мьянмар улсад үйл ажиллагаа явуулдаг гадаадын компаниудын хувьд мьянмар киатаар олсон ашгаа ам.доллар руу хөрвүүлж, түүхий эд, импортын бараа бүтээгдэхүүнээ худалдан авдаг. Гэвч 2021 оны хоёрдугаар сард тус улсын засгийн эрхийг цэрэг армийнхан гартаа оруулснаар бизнесийн байгууллагууд банкаар үйлчлүүлж, валют арилжихад хүндрэлтэй болсон байна.

Улмаар компаниуд Мьянмарын Гадаад валют Арилжааг Хянах Хорооны зөвшөөрөлтэйгөөр тус улсаас гүйлгээ хийж, импортын бараа бүтээгдэхүүний төлбөрийг тийн төлж барагдуулах ажээ.

Цэргийн засгийн зүгээс импортоор оруулж ирэхэд лиценз авах шаардлагатай бүтээгдэхүүний жагсаалтыг өргөжүүлсэн тул тус улсын ам.долларын нөөц зөвхөн ургамлын тос, шатахуун импортлоход зориулагдаж байгаа гэнэ.

Эх сурвалж: Nikkei Asia