Их Британийн хаан сэнтийд хамгийн удаан буюу 70 жил заларсан эрхэмсэг хатан хаан Элизабет Александра Мэри 96 насандаа таалал төгслөө.
Тэрбээр Лондоны цагаар Пүрэв гарагийн үдээс хойш Шотланд дахь Балморал эдлэндээ ойр дотны хүмүүс, үр хүүхдүүдээрээ хүрээлүүлэн амар тайван байдалтайгаар тэнгэрт одсон аж. Одоо түүний ууган хүү, Уэльсийн хунтайж асан Чарльз хаан ширээг залгамжлан авч Хамтын нөхөрлөлийн 14 хаант улсын шинэ эзэн хаан, төрийн тэргүүнд залран улсаа удирдах болно.
Хатан хаан Элизабет 1952 онд хаан ширээнд залран нийгмийн асар их өөрчлөлтийн гэрч болсон билээ. Тэрбээр дайны дараах хүнд үе, эзэнт гүрнээс Хамтын нөхөрлөлд шилжих их шилжилтийн үе, Хүйтэн дайны төгсгөл, Их Британи улс Европын холбоонд элсэх болон гарах зэрэг түүхэн томоохон үйл явдлуудын үед хаан ширээнээс улс орноо хамгаалж байсан юм.
Түүний засаглах хугацаанд 15 Ерөнхий сайд солигдсон бөгөөд тэдний дунд 1874 онд төрсөн Уинстон Черчиллээс эхлээд түүнээс 101 жилийн дараа буюу 1975 онд мэндэлсэн Лиз Трасс багтаж байна. Хатан хаан сэндийд суух бүх хугацаандаа долоо хоног бүр Ерөнхий сайдынхаа хамт иргэдийг хүлээн авч уулзаж заншсан байсан юм.
Лондон дахь Букингемийн ордны гадна Хатан хааны биеийн байдлын талаар мэдээлэл хүлээн санаа чилээн зогсож байсан иргэд уг гашуудлын мэдээг сонсоод эмгэнэн уйлж байна.
Эх сурвалж: BBC