Пүрэв гарагт Их Британийн хатан хаан хоёрдугаар Элизабет амьсгал хураасан билээ. Хаан угсааны гэр бүлийн хүрээнд хамгийн удаан хаан ширээнд суусан хатан хаан 96 насандаа Шотланд дахь Бальморал ордонд нас нөгчсөн юм.
Тэгвэл Английн Төв банкнаас пүрэв гарагийн орой мэдэгдсэнээр тэд шинээр хэвлэх бүх мөнгөн дэвсгэрт, зоосон мөнгө дээр гуравдугаар Чарльзын хөргийг буулгана гэсэн байна.
Мэдэгдэлд өгүүлснээр, “Өдгөө хэрэглээнд байгаа Эрхэм дээдэс хатан хааны хөрөгтэй мөнгөн тэмдэгтүүд хууль ёсны төлбөрийн хэрэгсэл хэвээр байх болно. Энэ тухай дэлгэрэнгүй мэдэгдлийг хатан хааныг оршуулах ёслол дуусаж, гашуудлын хугацаа өнгөрсөн хойно хийх болно” хэмээжээ.
The Guardian сониноос мэдээлснээр хатан хааны хөрөг зурагтай мөнгөн тэмдэгтийг гуравдугаар Чарльзын хөрөгтэй мөнгөн тэмдэгтээр солих үйл явц нийт 2 жилийн хугацаа шаардах гэнэ.
Эх сурвалж: ТАСС