Баасан гарагт Латви улсын Гадаад хэргийн сайд Эдгарс Ринкевичийн Твиттер хуудсаар дамжуулан мэдэгдсэнээр тус улсын засгийн газар Шенгений визтэй оросуудыг хилээрээ нэвтрүүлэхгүй байхаар шийджээ.
Түүний жиргэснээр, “Латви улсын засгийн газар Европын Холбооны визтэй ОХУ-ын иргэдийг Латви улсын хилээр нэвтрэхийг хориглохоор шийдвэрлэлээ” гэсэн байна.
Одоогийн байдлаар Балтийн гурван улс болоод Польш улс Шенгений визтэй, визний хугацаа нь хүчинтэй байгаа оросуудыг хилээрээ нэвтрүүлэхээс татгалзаад байгаа юм. Улмаар дээрх асуудлын хүрээнд Европын Холбоо хэлэлцэх төлөвтэй байгаа бөгөөд шийдвэртэй холбоотой журмыг Европын Холбооны ээлжит бус уулзалтаас хойш 10 хоногийн дотор баталж, олонд танилцуулах гэнэ.
Европын Комиссын зүгээс энэ долоо хоногийн мягмар гарагт хуралдаж ОХУ-ын иргэдэд Шенгений виз олгох хөнгөвчилсөн журмыг цуцлахаар шийдвэрлэсэн бөгөөд тэдний зүгээс шийдвэр Европын Холбооны зөвлөлөөр батлагдаж, ирэх 12-ны өдрөөс эхлэн хүчин төгөлдөр хэрэгжинэ гэж итгэж байгаа юм.
Эх сурвалж: ТАСС