Reuters, Bloomberg зэрэг гадаадын хэвлэл мэдээллийн хэрэгслүүдийн орон нутгийн цагаар 7-ны өдөр мэдээлснээр Lockheed Martin компанийн үйлдвэрлэсэн “F-35” үл үзэгдэх сөнөөгч онгоцны зарим эд ангиудад Хятадаас гаралтай түүхий эдийг ашигласан нь тогтоогдсон ба улмаар АНУ-ын засгийн газар худалдан авалтаа тодорхойгүй хугацаагаар зогсоосон тухай мэдээлжээ.

Пентагоны “F-35” онгоцны хамтарсан төслийн (JPO) хэвлэлийн төлөөлөгч Рассел Гомейер хэлэхдээ, "8-р сард явуулсан шалгалтын явцад F-35 сөнөөгч онгоцны хөдөлгүүрийн турбомашины шахуургад ашигласан соронзыг үйлдвэрлэхдээ Батлан ​​хамгаалах яамны худалдан авах ажиллагааны журманд үл зөвшөөрөгдөх БНХАУ-д үйлдвэрлэсэн хайлшийг ашигласан нь тогтоогдсон” гэв.

"Эрх баригчдын зүгээс баталсан дүрэм журамд захирагдан “F-35” сөнөөгч онгоцны худалдан авалтыг түр зогсоож буй юм” гэж тэрээр хэлсэн байна.

Харин Lockheed Martin компанийн зүгээс хийсэн мэдэгдэлдээ "Уг асуудал нь Honeywell компанийн үйлдвэрлэдэг турбо машинд ашиглагддаг самари-кобальт хайлштай холбоотой" хэмээн онцолжээ.

“F-35” сөнөөгч онгоцны хөдөлгүүрийн турбо машин нь туслах тэжээлийн эх үүсвэр болон агаарын эргэлтийг холбосноор үндсэн хөдөлгүүрийг асаах, аваарийн хүчийг ашиглах зэрэгт шаардлагатай эрчим хүчээр хангах үүрэгтэй байдаг аж.

Эх сурвалж: SBS