Бямба гарагт АНУ эдийн засгийн хямралд ороод буй Шри Ланка улсад 40 сая ам.долларын хөдөө аж ахуйн тусламж үзүүлэх болсноо зарлажээ.

АНУ-ын Олон улсын Хөгжлийн Агентлагийн администратор Саманта Пауэр Шри Ланка улсад айлчлахдаа тусламжийн тухай зарласан бөгөөд тэдний зүгээс 40 сая ам.долларын тусламжаас гадна бага орлоготой тариаланч нарт зориулан 6 сая ам.долларын тусламж олгох болжээ.

Шри Ланка улсын хувьд өрийн дефолт зарласнаар эдийн засгийн хямрал нь улам гүнзгийрч, хүнс, шатахуун, эм зэрэг нэн шаардлагатай бүтээгдэхүүний хомсдолд ороод байгаа юм.

Хатагтай Пауэрын хэлснээр Дэлхийн Хүнсний хөтөлбөрөөс мэдээлж байгаагаар өдгөө Шри Ланка улсын нийт хүн амын 30 орчим хувь буюу нийт 6 сая гаруй хүн өлсгөлөнд нэрвэгдээд байгаа гэнэ.

Ташрамд дурдахад Шри Ланка улс өдгөө нийт 51 тэрбум ам.долларын гадаад өртэй байгаа бөгөөд үүний 28 тэрбум ам.долларын өрийг 2027 он гэхэд төлж барагдуулсан байх ёстой ажээ.

Эх сурвалж: AP News