Nikola Motors ачаа, тээврийн цахилгаан машин зохион бүтээх компанийг үүсгэн байгуулсан Тревор Милтоны залилангийн хэргийн шүүх хурал өчигдөр эхэллээ. Милтоныг цахилгаан автомашин хөгжүүлэх явцыг худал мэдээлсэн, хөрөнгө оруулагчдад үлэмж их хэмжээний хохирол учруулсан хэмээн буруутгаж байна. Харин Милтон өөрийгөө буруугүй хэмээн мэдэгдэж буй.
Милтоны хэргийг бүтээгдэхүүнгүй компанид хөрөнгө оруулах эрсдэлийн тухай сургамж боллоо хэмээн үзэж байна. Үнэхээр ч, Nikola Motors 2020 онд нэг ч бүтээгдэхүүнгүй боловч 33 тэрбум ам.долларын үнэлгээтэйгээр АНУ-ын гурав дахь том автомашины компаниар тодорч байв. Гэвч тус компанийн үнэлгээ өчигдрийн байдлаар 2.3 тэрбум ам.доллар хүрч унасан байлаа.
Милтон 2015 онд Nikola Motors компаниа үүсгэн байгуулахдаа цахилгаан автомашины салбарыг ихэд сонирхдог эрхмүүдээс их хэмжээний хөрөнгө оруулалт авч чадсан юм. Улмаар 2020 оны зургаадугаар сард олон нийтэд нээлттэй хувьцаат компани болсон. Гэвч удалгүй нэгэн хувьцаа арилжаалагч алдартан “Nikola бол олон 10 худал хуурмаг дээр тогтсон, маш нарийн зохион байгуулалттай залилан” хэмээх утга бүхий дэлгэрэнгүй тайлан нийтлэл бичиж тараасан бөгөөд үүнээс хэд хоногийн дараа Милтон гүйцэтгэх захирлын албан тушаалаасаа огцорсон билээ. Удалгүй компанийн хувьцааны ханш 40 хувиар эрс буурсан бөгөөд бүх алдагдлыг Nikola Motors-ийн хөрөнгө оруулагчид үүрсээр байв. Тухайлбал, Nikola энэ оны хоёрдугаар улиралд 173 сая ам.долларын цэвэр алдагдал хүлээсэн билээ.
Өдгөө прокурорын газраас Милтоныг устөрөгчөөр ажилладаг том оврын автомашин үйлдвэрлэх талаар худал танилцуулга, мэдэгдэл хийсэн, мэдлэг муутай хөрөнгө оруулагчдыг зориудаар онилох замаар хөрөнгө оруулагчдыг төөрөгдүүлсэн гэж буруутгаж байна.
Милтон гүйцэтгэх захирлын суудлаасаа огцрохоос 32.5 сая ам.доллароор Юта мужид эдлэн газар, хувийн тийрэлтэт онгоц худалдаж авч, огцорсныхоо дараа 300 орчим сая ам.долларын хувьцаа борлуулсан. Шүүх түүнийг буруутай гэж тогтоосон тохиолдолд дээд тал нь 25 жил хорих ял оноох боломжтой ч Милтоны хувьд хөнгөн ял авах магадлал өндөр юм.
Эх сурвалж: Morning Brew