Баасан гарагт ОХУ-ын ерөнхийлөгч Владимир Путин, Энэтхэгийн ерөнхий сайд Нарендра Моди нар Узбекистан улсад уулзаж, худалдаа болоод эрчим хүчний салбар дахь хамтын ажиллагаагаа өргөжүүлэх хүрээнд хэлэлцээр хийх болсон билээ.

Тэгвэл уулзалтын хүрээнд урьдчилан бэлтгэсэн тоон баримтаас үзэхэд Орос-Энэтхэгийн худалдааны эргэлт энэ оны эхний зургаан сард 11.5 тэрбум ам.долларт хүрчээ.

ОХУ Украины нутаг дэвсгэр дээр цэргийн тусгай ажиллагаа явуулах болсноор барууны орнууд Орост эдийн засгийн багц хоригуудыг тавих болсон юм. Улмаар ОХУ Энэтхэг, Хятад тэргүүтэй улс оронтой хийх гадаад худалдаагаа өргөжүүлэх болсон билээ.

Үүний үр дүнд Орос-Энэтхэгийн гадаад худалдааны эргэлт эрчимтэй өссөн байна. Тодруулбал, энэ оны эхний хагаст дээрх улсуудын хоорондох гадаад худалдааны эргэлт 11.5 тэрбум ам.доллароор хэмжигдсэн бөгөөд энэ нь өнгөрөгч оны мөн үетэй харьцуулахад даруй 120 хувиар өссөн үзүүлэлт юм.

Эх сурвалж: ТАСС