“Тэг ковид” бодлогын улмаас Starbucks-ийн Хятад дахь борлуулалт тааруу байна. Гэвч Starbucks ирэх гурван жилийн дотор тус улс дахь нийт салбарынхаа тоог 50 хувиар нэмэх шийдвэр гаргалаа.
Starbucks-ийн Хятад дахь салбарын тоо энэ онд 6,000 харин 2025 онд 9,000 хүрнэ хэмээн компанийн хөрөнгө оруулагчдын хурлын үеэр зарлалаа. Улмаар ирэх гурван жилд борлуулалтынхаа хэмжээг хоёр дахин өсгөнө гэж үзжээ. Starbucks-ийн нийт борлуулалт энэ оны хоёрдугаар улиралд дэлхийн хэмжээнд гурван хувийн өсөлттэй байсан бол Хятадад 44 хувиар буурсан. Гэвч ковидын хязгаарлалт удаан үргэлжлэхгүй гэж үзсэн тул ийнхүү Хятад дахь зах зээлээ эрчимтэй тэлэх шийдвэрийг компанийн удирдах зөвлөл гаргасан байна. “Бид урт хугацааны хөрөнгө оруулалт хийж байна” хэмээн гүйцэтгэх захирал Ховалд Шульц хэлсэн юм.
Хятад улсын хувьд кофены зах зээл нь шинэхэн, ирээдүйд тэлэх орон зай хангалттай их бий гэж үздэг. Тэр дундаа Хятадын залуу үе дунд кофены соёл эрчтэй хөгжиж байна. Starbucks энэ боломжийг алдалгүй түрүүлж алхахыг хүссэн бололтой. Тус компанийн 2021 оны санхүүгийн жилийн орлогын 13 хувийг Хятадын хэрэглэгчид бүрдүүлжээ.
Эх сурвалж: Wall Street Journal