В.Путин, Ши Жиньпин нар Самарканд хотноо зохион байгуулж буй Шанхайн хамтын нийгэмлэгийн дээд хэмжээний уулзалтын үеэр нүүр тулан уулзлаа.
Орос Украин руу түрэмгийлэн халдсанаас хойш анх удаа Ши Жиньпин, Путин нар нүүр тулан уулзаж байна. Хятад улс Украины "тэнцвэртэй байр суурьтай" байгаад талархаж буйгаа илэрхийлэхийн зэрэгцээ АНУ-ын "нэг туйлт ертөнцийг бүтээх оролдлого" бүтэлгүйтэх болно гэлээ.
Харин Ши Жиньпин Хятад улс Оростой "агуу гүрнүүдийн” хувиар хамтран ажиллахад бэлэн хэмээн дурдсан юм. Хятад улсын хувьд Оросын түрэмгийллийг дэмжсэн мэдэгдэл огт хийж байгаагүй боловч ОХУ Украинд халдсан цагаас хойш худалдааны болон бусад төрлийн харилцаагаа улам тэлсээр байгаа юм.
Путин “Хятадын анд нөхөд маань Украйны хямралын асуудлаар тэнцвэртэй байр суурь хадгалж байгааг нь бид өндрөөр үнэлдэг” хэмээгээд “Хятадын талд Украин дахь нөхцөл байдлын тухай асуух, сонирхох зүйлс байгаа гэдгийг мэдэж байна. Ойлгож байна. Өнөөдрийн уулзалтаар бид өөрсдийн байр сууриа мэдээж тайлбарлах болно” гэж өгүүллээ.
Барууны орнуудын ноёрхлын эсрэг зогсож буй тэдний харилцаа улам бүр бэхжиж байгаа нь дэлхийн дэг журамд томоохон өөрчлөлт орж буйг илтгэж байна. Одоо Хятад улс ОХУ-ын хамгийн чухал түнш төдийгүй эдийн засгийн хувьд супер чадамжтай гүрэн болжээ. Уулзалтын үеэр Ши В.Путинг "эртний анд" хэмээн тодорхойлсон юм.
Тэд өнгөрсөн хоёрдугаар сард сүүлийн удаа нүүр тулан уулзаж байв. Тухайн үед буюу В.Путин Ши Жиньпиний урилгаар өвлийн Олимп үзэхээр Бээжинд хүрэлцэн очихдоо дотно харилцаатай улсууд, “хязгааргүй” нөхөрлөл тогтоож буй имижийг олонд харуулахыг ихэд хичээж байсан юм. Үүнээс хэд хоногийн дараа ОХУ Украин руу халдсан билээ.
Шанхайн хамтын нийгэмлэгийн дээд хэмжээний уулзалт үргэлжилж байна.
Эх сурвалж: BBC