АНУ-ын хамгийн том, сүлжээ дэлгүүрүүдийн нэг болох Walmart бэлэн хувцас худалдаагаа нэмэгдүүлэхийн тулд виртуал хувцасны өрөөтэй болжээ.
Энэ долоо хоногоос эхлэн хэрэглээнд нэвтэрч буй энэхүү виртуал хувцасны өрөө нь хэрэглэгч нарыг хүссэн хувцсаа дэлгүүрт очих шаардлагагүйгээр “өмсөж” үзэх боломжоор хангах гэнэ.
Виртуал хувцасны өрөөг санаачлагч Zeekit компанийг Walmart 2021 оны тавдугаар сард худалдан авч байсан бөгөөд одоо л хэрэглээнд нэвтэрч байгаа юм. Тийнхүү худалдан авагчид 270000 гаруй бэлэн хувцаснаас өөрт таалагдсаныг виртуал хувцасны өрөөнд “өмсөж” үзэх боломжтой болжээ.
Бэлэн хувцас нь голдуу Америкийн үндэсний брэндүүдийн хувцас байх гэнэ.
АНУ-д инфляцын түвшин өссөнөөр улс даяар хүнс, түрээс, цахилгааны үнэ нэмэгдсэн тул хэрэглэгчид бэлэн хувцас, тавилга зэргийг худалдан авах нь эрс багассан юм. Тиймээс Walmart энэхүү технологийг нэвтрүүлснээр хэрэглэгчдийн худалдан авалтад нөлөөлж чадна гэж итгэж байгаа ажээ.
Walmart дэлгүүрийн нэвтрүүлж буй энэ технологи хэрэглэгчийн биеийн харьцааг тоон алгоритм ашиглан хувилж, сонгосон хувцас хэрэглэгч өмссөн байхад ямар харагдах, хаанаа нугаларч, хэрхэн таарахыг тооцоолон өмссөн мэтээр үзүүлэх юм.
Эх сурвалж: CNBC