Герман улс Оросоос байгалийн хий авахгүй байсан ч ирэх өвлийг “өнтэй” давна гэж Германы Эдийн засгийн сайд Роберт Хабек хэллээ.

Герман дахь байгалийн хийн агуулахууд 90 гаруй хувийн дүүргэлттэй байна. Арваннэгдүгээр сараас өмнө 95 хувьд хүргэхээр ажиллаж байна хэмээн Европын эрчим хүчний мэдээллийн платформ AGSI мэдэгдэв. Германы хувьд эдгээр хийн агуулахыг дүүргэх нь Оросын хийг импортлохгүйгээр өвлийг давахад зайлшгүй шаардлагатай юм. “Хийн нөөц амжилттай нэмэгдэж байна. Ирэх өвөл бидэнд бага зэрэг аз дайрч цаг агаар хэт хүйтрэхгүй байвал Герман улс ирэх өвлийг тухтай давна. Гэхдээ хавар ирэхэд хийн нөөц бүрэн дууссан байх болно” гэж Эдийн засгийн сайд Роберт Хабек хэлжээ.

Орос улс дайн эхлүүлэхээсээ өмнө Европын холбооны байгалийн хийн хэрэглээний 40 орчим хувийг хангадаг байсан. Герман улс Норвег, Нидерланд, Бельги улсуудаас хоолойгоор байгалийн хий авч байна. Тэрчлэн Франц улс аравдугаар сараас Герман руу байгалийн хий экспортолж эхлэх бололтой.

Эх сурвалж: Deutsche Welle