Johnson & Johnson (J&J) компанийг хорт хавдар үүсгэдэг найрлагатай бүтээгдэхүүн худалдсан хэргээр шүүхэд өгсөн хүмүүс өчигдөр буюу Даваа гарагт давж заалдах шатанд гомдол гаргалаа. Нэхэмжлэгч иргэд хөрөнгө ихтэй компани байтлаа дампуурсан охин компаниа ашиглаж нэхэмжлэлээс бултах ёсгүй гэв.

Гомдол гаргагч иргэд АНУ-ын гуравдугаар тойргийн давж заалдах шатны шүүхэд хандан J&J-ийн охин компани болох LTL Management-ийн дампуурлыг хэрэгсэхгүй болгох хүсэлт тавилаа. Тэд LTL компани бол J&J-ийн хуулийн хариуцлагаас мултрах зорилгоор тусгайлан үүсгэн байгуулсан корпорац гэж мэдүүлсэн юм. LTL нь ямар нэг үйл ажиллагаа явуулдаггүй компани бөгөөд дампуурлын улмаас торгууль хүлээхгүй байх эсвэл маш бага хэмжээний мөнгийг удаан хугацааны турш цувуулан төлөх боломжтой ажээ.

J&J нь LTL компанийг өнгөрсөн аравдугаар сард салган байгуулсан. Тэгэхдээ талькийн асуудалтай холбогдох бүх хариуцлагыг тус компанидаа шилжүүлсэн юм. Улмаар албаар дампуурахад хүргэсэн гэж нэхэмжлэгч тал мэдүүллээ. J&J-ийн энэхүү бүтцийн өөрчлөлтийн үр дүнд 38,000 орчим нэхэмжлэл түр зогссон ажээ.

Johnson & Johnson-ийн хүүхдийн нунтаг тальк доторх asbestos хэмээх бодис нь өндгөвчний болон холбогч эдийн хорт хавдар үүсгэдэг гэж буруутгагдсан. Тус компани LTL охин компаниа байгуулан хуулийн хариуцлагаа шилжүүлэхээс өмнө шүүхийн шийдвэр, нэхэмжлэгч талтай тохиролцох зэрэг зардалд 3.5 тэрбум ам.доллар зарцуулаад байсан юм. Түүний дотор хорт хавдартай 22 эмэгтэйд 2 тэрбум ам.долларын нөхөн төлбөр төлсөн хэрэг багтана. Түүнчлэн 1,500 орчим нэхэмжлэлийг ямар нэг нөхөн төлбөр төлөлгүйгээр хэрэгсэхгүй болгосон билээ.

Эх сурвалж: Reuters