Spotify Technology S.A компани есдүгээр сарын 20 өдөр аудио номын шинэ бизнесээ танилцууллаа. Улмаар Spotify аппликейшныг хэрэглэгчид дуу хөгжим, подкастаас гадна 300,000 гаруй сонсдог номын каталог ашиглах боломж бүрдлээ.
Тус аудио номын санд “айдсын эзэн” Стивен Кинг, сэтгүүлч Малкольм Гладуэлл, романтик зохиолч Эбби Жименез зэрэг нэрт зохиолч, сэтгүүлчдийн бүтээл багтжээ. Төлбөрийн хувьд татсан номын тоогоор тооцогдох бөгөөд өрсөлдөгч Apple, Amazon, Google-ийн аудио номуудтай ойролцоо үнэтэй юм байна. Spotify өнгөрсөн жил олон улсад аудио ном түгээх үйлчилгээ эрхэлдэг Findaway компанийг худалдан авахаар болсноо зарлаж байсан. Тус худалдан авалтын ажиллагаа зургаадугаар сард эцэслэснээр өдгөө ийнхүү бизнесийн шинэ салбарынхаа нээлтийг хийж байна.
“Spotify аудио номын салбартаа зар сурталчилгаа, захиалгат үйлчилгээ, тусгай сонголтот номын сан нэвтрүүлэх зэрэг бизнесийн олон загварыг үргэлжлүүлэн судалж байна” хэмээн дэд ерөнхийлөгч, аудио ном хариуцсан захирал Нир Зихерман хэллээ.
Эх сурвалж: Wall Street Journal