Хятадын худалдааны төв болсон Шанхай хотод дөрөвдүгээр болон тавдугаар сард ковидын цар тахалтай холбоотойгоор өргөн хүрээний хөл хорио тогтоосон. Үүний улмаас уналтад ороод буй эдийн засгийг сэргээхээр нийт 1.8 их наяд юань буюу 257 тэрбум ам.долларын найман төсөл дэд бүтцийн салбарт хэрэгжүүлэхээр болжээ.
Хятадын хамгийн том хот Шанхайн эдийн засаг хоёрдугаар улиралд 13.7 хувиар агшсан нь Хятадын 31 бүсийн хамгийн муу үзүүлэлт юм. Энэ оны эхний найман сарын байдлаар Шанхайн дэд бүтцийн хөрөнгө оруулалт 27.4 хувиар буурсан. Харин улсын хэмжээнд 8.3 хувиар багассан юм.
Эдийн засгийг сэргээх найман төслийн нэг нь Шанхайн зүүн бүсийн Пудон орчимд хэрэгжинэ. Түүнд төмөр зам, орон сууцны барилга, эрчим хүч үйлдвэрлэх далайн салхин сэнсний ферм, цэцэрлэгт хүрээлэн зэрэг бүтээн байгуулалт багтаж байна.
Сүүлийн саруудад Шанхайд хөрөнгө оруулах нь нэмэгдэж байна. Өнгөрсөн зургаадугаар сараас есдүгээр сарын дунд үе хүртэл хугацаанд 597 томоохон төсөл хэрэгжүүлэхээр нийт дүнгээр 941 тэрбум юанийн хөрөнгө оруулалтын гэрээ байгуулсан бөгөөд 296 төсөл нь хэрэгжиж эхэлсэн гэж Шанхайн хотын захиргаанаас мэдээлжээ.
Эх сурвалж: Reuters