TikTok-ийн гол өрсөлдөгч YouTube Shorts платформ зар сурталчилгааны орлогоо видео хөгжүүлэгч иргэдтэй хуваалцах шинэ хөтөлбөр эхлүүлэхээр шийджээ.
2023 оны эхний улиралд хэрэгжиж эхлэх тус хөтөлбөрт хүсэлт гарган батлагдсан иргэд зар сурталчилгааны орлогын 45 хувийг дансандаа хүлээн авах юм байна. Сурталчилгааны орлогыг тухайн бичлэгийн нийт үзэлтийн тоогоор хувилан тооцно. YouTube компани Shorts дээрх бүх сурталчилгааны орлогыг нэгдсэн санд цуглуулах бөгөөд тэндээс холбогдох хөгжмийн зохиолч, бичлэг бүтээгч нарт хуваарилагдан хүрэх ажээ.
Энэхүү түншлэлийн хөтөлбөрт хамрагдахын тулд босго шаардлагыг давсан байх хэрэгтэй. Видео бүтээгчийн Shorts дахь бичлэгүүд сүүлийн гурван сард нийт 10 саяас дээш хандалт авсан байх мөн бүтээгчийн хуудас хамгийн багадаа 1,000 дээш тооны дагагчтай байх ёстой юм.
Эх сурвалж: NBC News