Австралийн төв банк цар тахлын үед улс орныхоо эдийн засгийг дэмжих үүднээс худалдаж авсан бондуудаасаа 44.9 тэрбум австрали доллар буюу 30 орчим тэрбум ам.доллар алдсанаа мэдэгдлээ.
Тус алдагдлаас 2021-2022 оны ашгийг суутган тооцвол 36.7 тэрбум австрали долларын цэвэр алдагдал үлдээж байгаа юм. Австрали улс ковидын цар тахалтай холбогдох яаралтай тусламжийн хөтөлбөрийн хүрээнд 300 тэрбум австрали долларын бонд цуглуулсан билээ. Нөөцийн банкнаас мэдэгдсэний дагуу энэхүү алдагдал нь банкны хэвийн үйл ажиллагаанд нөлөөлөхгүй. Банк бондуудаа тус бүрийн хугацааг дуустал хадгалах төлөвлөгөөтэй байна. Энэ нь алдагдлаа нөхөн ашиг руу шилжих магадал бий гэсэн үг юм.
Дэлхийн бусад төв банкууд ижил төстэй байдлаар алдагдал хүлээж байна. Тухайлбал, Швейцарын Үндэсний банк энэ оны эхний хагас жилд 95.2 тэрбум швейцар франк буюу 98.7 тэрбум ам.долларын алдагдал хүлээсэн тухайгаа долоодугаар сард мэдээлсэн билээ.
Эх сурвалж: BBC