Францын ерөнхийлөгч Эммануэль Макрон орон нутгийн цагаар 22-ны өдөр олон нийтэд хандан үг хэлэхдээ, ОХУ Украинд халдан түрэмгийлсний улмаас үүсээд буй эрчим хүчний хямралыг шийдвэрлэхийн тулд сэргээгдэх эрчим хүчний үйлдвэрлэлийн бүтээн байгуулалтын ажлыг түргэтгэхээ мэдэгдэв.
Ерөнхийлөгч Макрон Францын анхны далайн салхин цахилгаан станцыг барих баруун боомт хот Сен-Назерт айлчлах үеэрээ холбогдох хуулиудыг шинэчлэн найруулна гэж мэдэгдсэн талаар BFM болон Associated Press агентлагууд мэдээлэв.
Тухайлбал, далайн салхин цахилгаан станцыг барьж ашиглалтад оруулахад зарцуулдаг хугацаа 10-12 жил байсныг 6 жил болгон бууруулах бол нарны цахилгаан станц байгуулахад 6 жил зарцуулдаг байсныг 3 жил болгон бууруулах зорилт тавьж буй аж.
Тэрээр үргэлжлүүлэн, Украины дайн Оросын байгалийн хийд түшиглэсэн Европын эрчим хүчний загварыг эвдэж, бүх зүйлийг өөрчилсөн гэж хэлээд сэргээгдэх эрчим хүчний хөгжлийг түргэтгэх шаардлагатайг дахин онцолжээ.
Франц улс нт 2020 он гэхэд эрчим хүчний эх үүсвэрийнхээ 23 хувийг сэргээгдэх эрчим хүчнээс үйлдвэрлэх зорилт тавиад байсан ч бодит байдал дээрээ Европын холбооны 27 гишүүн орныг уг үзүүлэлтээр нь дундажласан хувь болох 22-оос ч бага буюу ердөө 19 хувьтай байгаа юм.
Цөмийн шинэ реактор барих төлөвлөгөөгөө өмнө нь зарлаж байсан ерөнхийлөгч Макрон "Зөвхөн сэргээгдэх эрчим хүч юм уу цөмийн эрчим хүчийг дангаар ашиглах нь үр дүнгүй юм" гэж хэлээд, цөмийн цахилгаан станцуудын бүтээн байгуулалтын явцыг мөн хялбарчлах шаардлагатай байна гэв.
Франц улс эрчим хүч үйлдвэрлэлийнхээ бараг 70 орчим хувийг цөмийн эрчим хүчнээс гарган авдаг ч 56 цөмийн реакторын 32 нь эвдрэл гэмтэл, зэврэлт зэргээс болж үйл ажиллагаа явуулах боломжгүй байгаа нь эрчим хүчний хангамжид ачаалал өгөх болжээ.
Нэгэн цагт Европын хамгийн том цахилгаан эрчим хүч экспортлогч байсан Франц улс энэ өвөл хангалттай эрчим хүч үйлдвэрлэх боломжгүйн дээр цахилгаан эрчим хүчний хэмнэлтийн бодлогыг хэрэгжүүлэхээс өөр аргагүйд хүрж болзошгүй байдал тулгараад байгаа билээ.
Эх сурвалж: Yonhap
Үхэр минь хөлдөөж яахнуу чамд гай болсон биш
Хурдхан өвөл болоод үзэл бодлоо бусад улсад тулагдаг эдгээр хөгжилтэй гэх оронуудыг хөлдөөгөөд өгөөч бурхан минь