Францын эрчим хүчний томоохон тоглогчдын нэг TotalEnergies компани орон нутгийн цагаар 24-ний өдөр Катарын хийн ордыг өргөжүүлж хөгжүүлэхэд 1.5 тэрбум ам.долларын хөрөнгө оруулалт хийх гэрээнд үзэглэсэн талаар France Press болон Bloomberg News сувгууд мэдээлэв.

Тус мэдээнд дурдаснаар Катарын Эрчим хүчний сайд Саад Аль-Каби болон TotalEnergies компанийн ерөнхий захирал Патрик Фуян нар мөн өдөр гэрээнд гарын үсэг зурсан байна. Ингэснээр тус компани нь Northfield South Gas төслийн 9.3 хувийг эзэмших юм. Northfield South Gas төслийн 25 хувийг Франц болон гадаадын компаниуд эзэмших бол үлдсэн 75 хувийг нь Катарын засгийн газар эзэмших аж.

Өнгөрөгч 6-р сард TotalEnergies компани нь Northfield East Gas төсөлд мөн 2 тэрбум ам.долларын хөрөнгө оруулах гэрээнд гарын үсэг зураад байсан билээ.

Аль-Каби өнөөдөр хэвлэлийн бага хурал дээр хэлэхдээ, Катарын байгалийн хийн хөгжлийг өргөжүүлэхэд Францын TotalEnergies компани стратегийн үүрэг гүйцэтгэнэ хэмээн цохон тэмдэглэсэн байна.

1.5 тэрбум ам.долларын нэмэлт хөрөнгө оруулалттай холбогдуулан Фуян "Бидэнд эрчим хүч үйлдвэрлэлийн шинэ суваг зайлшгүй хэрэгтэй" гэж тайлбарлаад Европын орнууд шингэрүүлсэн байгалийн хийн (LNG) урт хугацааны гэрээнд гарын үсэг зурахад бэлтгэх ёстой гэж дурджээ.

Украинд халдан түрэмгийлснийх нь төлөө Барууны орнууд ОХУ-ын эсрэг хориг арга хэмжээ авч эхэлснээс хойш эрчим хүчний үнэ огцом өссөөр байгаа билээ. Тиймээс Европын орнууд Оросын хийг орлох эрчим хүчний импортын тогтвортой, найдвартай сувгийг олохын тулд тун их хичээл зүтгэл гаргаж байгаа юм.

Германы канцлер Олаф Шольц мөн өдөр Саудын Арабт айлчилж угсаа залгамжлах ханхүү Мохаммед бин Салмантай уулзах бол 25-нд Арабын Нэгдсэн Эмират (АНЭУ) болон Катарт айлчлахаар болсон талаар бид мэдээлсэн билээ. Герман улс Катартай шингэрүүлсэн хий болон устөрөгч нийлүүлэх гэрээ байгуулах төлөвлөгөөтэй байгаа юм.

Катар бол АНУ, Австралийн дараа орох шингэрүүлсэн хийн хамгийн үйлдвэрлэгч орнуудын нэг юм. Катарын Northfield South хийн ордод дэлхийн байгалийн хийн нөөцийн 10 хувь байдаг юм.

Өнөөг хүртэл Өмнөд Солонгос, Япон, Хятад улсууд Катарын шингэрүүлсэн хийн гол экспортын зах зээл байсан бол Европ холбооны орнууд эрчим хүчний асуудалд нэрвэгдэх болсноор Катар нь Их Британи, Герман зэрэг орнуудтай нийлүүлэлт, хамтын ажиллагааны нэмэлт төлөвлөгөөг хэрэгжүүлэх болоод байгаа билээ.

Эх сурвалж: Yonhap