Оросын цахим худалдааны платформ Ozon Holdings Plc-ийн хувьцаа Америкийн биржээс хасагдсаны улмаас бүтцийн өөрчлөлт хийхэд хүрсэн. Энэ хүрээнд ам.долларын хөрвөх бондоо 35 хувийн хөнгөлөлттэй үнээр эргүүлэн худалдаж авахыг санал болгож байна.
Тэгэхдээ рублиэр бол нэрлэсэн үнийн дүнгийн 83 хувиар, ам.доллароор бол нэрлэсэн үнийн дүнгийн 65 хувиар тооцох ажээ. Тус компанийн 750 сая ам.долларын хөрвөх бондын хугацаа 2026 онд эцэслэх байсан боловч ОХУ Украинд халдсаны улмаас NASDAQ биржээс хасагдсан тул 2022 оны эхээр эргүүлэн төлөх хэрэгтэй болсон. Гэвч тухайн үед санхүүгийн боломжгүй байсны улмаас бонд эзэмшигчидтэй хэлэлцээр хийсээр өнөөдрийг хүрсэн билээ. Компанийн зүгээс Орос дахь охин компаниудаасаа шаардлагатай санхүүжилтийг гаргаж байгаа бөгөөд ОХУ-ын засгийн газраас зөвшөөрөл олгосон гэв.
Эх сурвалж: Bloomberg