ОХУ-ын ГХЯ-ны сайд Сергей Лавров орон нутгийн цагаар 24-ний өдөр НҮБ-ын Ерөнхий Ассамблейн чуулганд үг хэлэх үеэрээ Энэтхэг, Бразили улсуудыг НҮБ-ын Аюулгүйн Зөвлөлийн байнгын гишүүн орнууд болгох хэрэгтэй гэв.

ТАСС болон The Guardian, Reuters зэрэг томоохон агентлагуудын мэдээлснээр, Гадаад хэргийн сайд Лавров мөн өдөр Нью-Йорк хот дахь НҮБ-ын төв байранд зохион байгуулагдаж буй НҮБ-ын Ерөнхий Ассамблейн 77-р чуулган дээр ийнхүү мэдэгдээд авчээ.

Лавров “Зарим улс орнууд Аюулгүйн зөвлөлийн эрх мэдлийг алдагдуулах оролдлого хийж байгаад бид санаа зовохгүй байж чадахгүй. Тэдгээр улсууд Аюулгүйн зөвлөл болон НҮБ өнөөдрийн бодит байдалд дасан зохицох ёстой” хэмээн сэтгэгдлээ илэрхийлсэн байна.

Тэрээр мөн АНУ нь Тайванийг тойрон "галаар тоглож байна" хэмээн шүүмжилжээ.

Түүнчлэн АНУ-ыг Энэтхэг-Номхон далайн орнуудаас бүрдсэн “хаалттай” бүлэглэл байгуулж байгааг шүүмжилж Азийн бүс нутгийг хяналтандаа байлгахыг оролдож байна гэж үзэж байгаагаа цохон тэмдэглэв.

Тэрээр “Дэлхийн ирээдүйн хувь заяа яг одоо л шийдэгдэх гэж байна. Тодруулж хэлвэл зөвхөн нэг орны ноёрхолд нийцүүлсэн дэг журамтай болох уу үгүй юу гэдэг асуудал тулгараад байна” хэмээн АНУ-ыг чичилжээ.

Өнгөрсөн наймдугаар сард АНУ-ын Конгрессын Төлөөлөгчдийн танхимын дарга Нэнси Пелоси Тайваньд айлчилснаас хойш Тайванийн хоолой дахь цэргийн хурцадмал байдал нэмэгдсээр байгаа билээ.

Харин ерөнхийлөгч В.Путин Хятадыг дэмжихээ тодорхой илэрхийлсээр байгаа юм.

Тодруулбал тэрээр өнгөрөгч 15-ны өдөр Узбекистаны Самарканд хотноо зохион байгуулагдсан Шанхайн хамтын ажиллагааны байгууллагын дээд хэмжээний уулзалтын үеэр БНХАУ-ын дарга Ши Жиньпинтэй уулзах үеэрээ "Тайванийн хоолойд АНУ болон түүний холбоотнуудын өдөөн хатгалгыг эрс буруушааж байна" гэдгээ илэрхийлсэн билээ.

Эх сурвалж: Newsis