Японы Mazda Motor Corp компани Оросын зүүн хэсэгт орших Владивосток хотод орон нутгийн автомашин үйлдвэрлэгч Sollers компанитай хамтарсан үйлдвэр эрхэлдэг. Өдгөө тус үйлдвэрийнхээ үйл ажиллагааг зогсоох тухай ярилцаж байна.
Үйлдвэр өнгөрсөн онд Оросын зах зээлд 30,000 гаруй автомашин борлуулсан. Гэвч гуравдугаар сард автомашины эд ангиудын хангамж тасалдах магадлал өндөр байгаа тухай Mazda-ийн зүгээс мэдээлж байсан. Улмаар хангамжийн нөөц дууссан тохиолдолд Орос дахь үйлдвэрлэлээ бүрэн зогсооно гэсэн юм. Өдгөө хангамж дуусаж байгаа ажээ. Гэвч үйлдвэрийг хэзээ хаах тухай ямар нэг албан мэдэгдэл, хугацаа одоогоор зарлаагүй байна.
Mazda-ийн өрсөлдөгч Toyota Motors Corp Орос дахь үйлдвэрээ хаах болсноо уржигдар буюу Баасан гарагт албан ёсоор мэдэгдсэн билээ. Шалтгаан нь мөн адил эд ангийн хангамж тасарсан гэж Toyota мэдэгдлээ.
Эх сурвалж: Reuters