ОХУ-ын Ерөнхийлөгч В.Путин цэрэг татлагын эсрэг жагсаалын үеэр Москва, Санкт-Петербург хотуудын дунд орших Геленджик хавьд байрладаг нууц ордон руугаа зугтсан хэмээн Business Insider мэдээлжээ.

Тус мэдээллийг чөлөөт сэтгүүлч Фарида Русамова гурван эх сурвалжаар баталгаажуулсан хэмээн нийтэлсэн байна. В.Путин хэсэгчилсэн цэрэг татлага зарласан өдөр буюу өнгөрсөн Лхагва гарагт амралтын ордон руугаа явсан аж. Тэнд тэрбээр "бие, сэтгэлээ амрааж байгаа” гэж Русамова Telegram хуудаснаа нийтэлсэн байна. Нийслэлд эргэн ирэх хамгийн ойрын хугацаа нь Пүрэв гараг байх магадлал өндөр боловч өөрийнхөө хэд хэдэн видео бичлэгийг хийн төрийн хэвлэлүүдээр тодорхой хуваарийн дагуу цацуулахаар үлдээсэн ажээ.

В.Путин тэрхүү тансаг ордныг өөрийнх нь эзэмшил биш хэмээн үгүйсгэдэг. Шоронд хоригдож буй Оросын идэвхтэн Алексей Навальный тус ордон нь нисэх онгоцгүй бүс бөгөөд хамгаалалтын хашаатай, усан зогсоол, сүм хийд, дарсны агуулах, кино театр, спорт заал, бассейн, спа, хоккейн талбай зэрэг олон хэсэгтэй гэж өгүүлсэн байдаг. Навальный үүсгэн байгуулсан Авлигатай тэмцэх сан В.Путины ойрын хүмүүсийн “хандивласан” мөнгөөр тус ордныг санхүүжүүлсэн гэдэг ч Кремль үүнийг үгүйсгэж байгаа юм.

Эх сурвалж: Business Insider