Ням гарагт Украины ерөнхийлөгч Володимир Зеленський дайны үйл явцын хүрээнд ээлжит дүрс бичлэг бүхий мэдэгдлээ хүргэжээ. Мэдэгдэлд тэрээр ОХУ Крымын хойг, Кавказ, Сибирийн уугуул иргэдийг хөнөөхийг тулд цэргийн хэсэгчилсэн дайчилгаа явуулж байна гэж үзэж байгаагаа дурдсан байна.

Түүний хэлснээр, “ОХУ-ын зүгээс хэсэгчилсэн дайчилгаа явуулж байгаа нь дан ганц Украины ард иргэдийг уй гашууд унагаж, дэлхийн тогтвортой байдлыг алдагдуулах бус харин түр хугацаанд өөрсдийн эрхшээлд оруулсан газар нутгийн уугуул иргэдийг бие махбодын хувьд сүйтгэх зорилготой.

Крымын хойг дахь нөхцөл байдал өдгөө гамшгийн хэмжээнд байна. Крымын хойг дахь татаруудын талаар ирсэн мэдээлэл үнэн болох нь батлагдсан. Хэсэгчилсэн дайчилгааны зарлан дуудах хуудсыг түлхүү Крымын татарууд буюу Крымын хойгийн уугуул эрчүүдэд илгээсэн байсан. Энэ нь Оросын геноцидын бодлогын нэг элемент бөгөөд дэлхий нийтээр Оросын эсрэг нэн даруй, хатуу арга хэмжээ авах нэг шалтгаан юм.

Үүнтэй ижил төстэй зүйл Оросын нутаг дэвсгэрт ч болж байгаа. Энэ бол эзэнт гүрний маш нарийн тооцоолсон бодлого. Тухайлбал, Дагестаны ард иргэд, бүх кавказууд, Сибирь болон бусад нутаг дэвсгэрийн уугуул ард түмэнд ч эн мэт цохилт ирж байгаа.

Дагестаны ард иргэд л гэхэд өөрсдийн амьдралын төлөө тэмцэх болсон.

Яагаад тэдний нөхөр, ах дүү болоод хөвгүүд энэ дайнд үхэх ёстой гэж? Нэг л хүний хүсэж буй энэ дайнд, манай газар нутаг дээрх манай ард иргэдийн эсрэг өдүүлсэн дайнд, яагаад тэд үхэх ёстой гэж? Владимир Путин өөрийн хүүхдүүдийг л лав дайнд явуулахгүй. Тэмц, тэгж гэмээнэ танай хүүхдүүд үхэл рүүгээ явахгүй. Оросын дайчилгаанд хүн бүхэн өртөх боломжтой. Хэрэв та бүхэн манай хүүхдүүдийн амийг авахаар ирвэл би үүнийг эцэг хүний хувьд хэлье. Бид та нарыг амьд буцаахгүй” гэжээ.

Эх сурвалж: Украинская Правда