Унгарын Гадаад хэрэг, худалдааны сайд Петер Сийярто орон нутгийн цагаар 25-ны өдөр Унгарын MR1 радиод ярилцлага өгөх үеэрээ, барууны орнуудын ОХУ-ын эсрэг авсан хориг арга хэмжээ нь "бүхэлдээ бүтэлгүйтсэн"-ий дээр зөвхөн Европын орнуудад асар их хохирол учруулсан хэмээн онцолжээ.

Тэрээр ОХУ Украинд халдан түрэмгийлсэнтэй холбоотойгоор Европын холбооны зүгээс ОХУ-ын эсрэг авсан хориг арга хэмжээнүүд нь Европ дахь инфляцийг хөөрөгдөж, байгалийн хий, хүнсний бүтээгдэхүүний үнийг огцом өсгөж “Европ тив тэр аяараа эдийн засгийн уналтад ороод байна" хэмээн цохон тэмдэглэв.

"Европын холбооны авч хэрэгжүүлсэн хориг арга хэмжээ Оросоос илүү Европт хохирол учруулсан нь өдгөө тодорхой болоод байгаа ба энэ арга хэмжээ бүрэн бүтэлгүйтсэн. Үүний улмаас Европын эдийн засаг ихээхэн хохирол амссаар байна" хэмээн тэрээр өгүүлжээ.

Европын холбооноос 8 дахь багц хориг арга хэмжээ авахаар хэлэлцэж буй талаарх түүний сэтгэгдлийг асуухад "энэ мөн л буруу тийшээ явж буй хэрэг" бөгөөд одоогоор эцсийн шийд гараагүй байгаа гэв. Түүнчлэн одоохондоо нэмэлт хориг арга хэмжээ авах тухай албан ёсны санал гаргахад хэцүү байж магадгүй хэмээн сайд Сийярто дурдсан байна.

“Унгарын үндэсний эрх ашигт үл нийцэх, хохирол учруулах аливаа шийдвэрийг бид эсэргүүцэх болно. Манай улсын эрчим хүчний хангамжид “улаан гэрэл” асаад буй энэ түгшүүртэй цаг үед нэмэлт хориг арга хэмжээ авах нь нөхцөл байдлыг улам дордуулах учир эрсдэлийг хүлээн зөвшөөрөх боломжгүй” хэмээжээ.

Тэрээр үргэлжлүүлэн эдгээр хориг арга хэмжээнээс зөвхөн АНУ-ын эдийн засаг л ашиг хүртэх бөгөөд Европын эдийн засаг улам бүр “намагт шигдэж” болзошгүйг анхааруулав.

"Хэрэв бид дипломат сувгууд болон харилцааны сувгуудаа хааж, Оросын эсрэг авч хэрэгжүүлж буй хориг арга хэмжээгээ үргэлжлүүлсээр байвал энэ дайн дуусна гэсэн итгэл найдвараа үүрд орхих хэрэгтэй болно" хэмээн ярьжээ.

Эх сурвалж: Newsis