NASA-ийн сансрын төхөөрөмж дэлхийгээс 11 сая километр зайд орших Dimorphos хэмээх солирыг өнөөдөр амжилттай онож мөргөлөө.

Дэлхийг солиртой мөргөлдөхөөс сэргийлэх зорилгын хүрээнд хэрэгжүүлж буй Dart төсөл нь солирын чиглэлийг өөрчлөх туршилтаа ийнхүү амжилттай эхлүүллээ. “Одоо солирын чиглэл, хөдөлгөөнийг анхааралтай ажиглах л үлдлээ” хэмээн NASA-ийн Гарагийн шинжлэх ухааны салбарын дарга Лори Грейз хэлсэн юм.

NASA-ийн 624 килограмм жинтэй төхөөрөмж нь нэг цагт 23 мянга орчим километр хурдтайгаар Dimorphos солирт хүрч тогтсон цагтаа амжилттай мөргөн сүйрсэн байна. Улмаар Didymos хэмээх том солирыг тойрон эргэлдэж буй Dimorphos хэмээх 170 метр диаметртэй жижиг солир нь чиглэлээ хэрхэн өөрчлөхийг алдарт Жеймс Уэбб супер телескопоор үргэлжлүүлэн ажиглаж байна. Ийнхүү хүн төрөлхтөн тэнгэрийн биетийн чиглэлийг өөрчлөх анхны оролдлого амжилттай эхлүүллээ.

Эх сурвалж: Business Insider