Apple компанийн гүйцэтгэх захирал Тим Күүк дэлхийн технологийн салбарт эмэгтэйчүүдийн орон зай хангалтгүй байна хэмээжээ.

Энэ талаар тэрээр BBC агентлагт өгсөн ярилцлагадаа дурдсан бөгөөд түүний хэлснээр технологийн салбар ажиллах хүчээ тэлж, төрөлжүүлж чадахгүй болбоос хүрэх ёстой өндөрлөгтөө хүрч чадахгүй байж магадгүй гэсэн байна. Тим Күүкийн хэлж байгаагаар тус салбарт эмэгтэйчүүдийн орон зай дутагдаж байгааг тайлбарлах ямар ч сайн шалтаг байхгүй бөгөөд асуудлын хүрээнд тулгамдаж буй нэг бэрхшээл нь мэргэжил сонгох насны охид шинжлэх ухаан, технологи, инженерчлэл, математикийн салбарыг сонгохгүй байгаатай холбоотой хэмээсэн байна.

Apple компанийн хувьд 2021 онд л гэхэд АНУ дахь нийт ажилтны ердөө 35 хувь нь эмэгтэй ажилчид байсан юм.

Тийнхүү Apple компанийн зүгээс технологийн салбар дахь эмэгтэйчүүдийн орон зайг тэлэх зорилгоор “үүсгэн байгуулагчдын хөгжлийн хөтөлбөр” гэх хөтөлбөрийг эхлүүлсэн байна. Уг хөтөлбөр нь Их Британи улс дахь эмэгтэй үүсгэн байгуулагчид хийгээд аппликэйшн хөгжүүлэгч нарт чиглэх ажээ.

Эх сурвалж: BBC