Энэ оны эцэс гэхэд цөмийн эрчим хүчнээс татгалзахаа амлаж байсан Герман улс өдгөө ашиглагдаж буй гурван атомын цахилгаан станцын хоёрынх нь ашиглалтын хугацааг хамгийн уртдаа ирэх оны дөрөвдүгээр сарын дунд хүртэл сунгах төлөвтэй байна.

Тус улсын шадар сайд бөгөөд Эдийн засаг, цаг уурын сайд Роберт Хавек орон нутгийн цагаар 27-ны өдөр хэлэхдээ, Германы өмнөд хэсэгт орших "Исар 2" болон "Некарвестхайм” хоёр атомын цахилгаан станцыг энэ оны эцэс гэлгүй цаашид ч ажиллуулах шаардлагатай хэмээн онцолжээ.

Франц улсын зүгээс цөмийн цахилгаан станцууддаа их засвар хийснээс болж эрчим хүчний хангамж хүрэлцэхгүй байх магадлалтайг харгалзан үзээд “Бидэнд зайлшгүй нөөц эх үүсвэр шаардлагатай гэж бодож байна” хэмээн тэрээр цохон тэмдэглэсэн байна.

“Исар 2” атомын цахилгаан станцын хувьд эцсийн шийдвэрийг 12-р сар гэхэд гаргах шаардлагатай бол “Некарвестхайм”-ын хувьд ирэх оны эхээр эцэслэн шийдэх ёстой аж.

Шадар сайд Хавек хэлэхдээ дээрх станцуудын үйл ажиллагааг сунгах нь бид үндсэн бодлогоосоо ухарч буй хэрэг биш бөгөөд "цөмийн зэвсгээс татгалзах" байр сууриа хадгалахаа тодорхой хэлэв.

"Цөмийн эрчим хүч бол өндөр эрсдэлтэй технологи гэдэг байр сууриа бид хадгалсаар байх болно" гээд тэрээр ямар нэгэн байдлаар энэ төрлийн шинэ станцыг барихгүй гэж нэмэлт тайлбар хийжээ.

Герман анх энэ оны эцэс гэхэд цөмийн эрчим хүчнээс татгалзахаар төлөвлөж байсан ч Орос улс Европт нийлүүлэх байгалийн хийн нийлүүлэлтийнхээ хэмжээг үе шаттайгаар багасгасаар өдгөө бүр зогсоогоод байгаатай холбогдуулан атомын цахилгаан станцуудын үйл ажиллагааг сунгах эсвэл аль хэдийн хаагдсан атомын цахилгаан станцуудын үйл ажиллагааг эргэн сэргээх шаардлагатай гэх маргаан сүүлийн үед газар аваад байгаа билээ.

Герман улс цахилгаан эрчим хүчнийхээ 10-15 хувийг импортын хийгээр хангадаг юм.

Эх сурвалж: MBC