Оросын олигарх Петр Авенд банкны данс байхгүй. Тэрбээр эхнэрийнхээ нэрийн данс болон үл хөдлөх хөрөнгийн менежментийн компанийнхаа дансыг ашиглан хувийн зардлаа төлж байсан нь Оросын олигархуудын эсрэг тавьсан хориг арга хэмжээг зөрчсөн хэрэг хэмээн Их Британийн хууль хэрэгжүүлэгч байгууллага үзэж байна.
Европын холбоо Петр Авенд хориг тавихаас хэдхэн цагийн өмнө тэрбээр Австрийн итгэлцлийн сангаас 3.7 сая фунт стерлингийг Их Британи дахь данс руу шилжүүлсэн. Мөн өөрийн компанийн хөрөнгийг хувийн хэрэглээндээ зарцуулж байгаа гэх хоёр шалтгаанаар Британийн Үндэсний гэмт хэрэгтэй тэмцэх агентлаг Петр Авенд хэрэг үүсгэн шалгаж байна. Улмаар түүнтэй холбогдох данс дахь 1.5 сая фунт стерлингийг царцаасан. Хорионд багтсан орос олигархуудыг хянах зорилготой байгуулагдсан “Клептократын нэгж” хэмээх тусгай үүрэг бүхий байгууллага түүнийг Monzo Bank болон HSBC Holdings компани хооронд гүйлгээ хийснийг тогтоосон юм.
Петр Авен тус мөнгөн шилжүүлгийн зориулалтыг Лондон дахь үл хөдлөх хөрөнгийнхөө аюулгүй байдлыг хангах үйлчилгээний төлбөр хэмээн мэдэгдэж байна. Мөн Их Британийн хууль сахиулагчид Авеныг хориг арга хэмжээг зөрчсөн хэрэгт унагахыг зориуд оролдож байна гэж Авены хуульчид үзэж байна. Анхан шатны шүүхийн сонсголын үеэр шүүгч Авены үл хөдлөх хөрөнгийн дансанд тавьсан зарим хязгаарлалтыг зөөлрүүлсэн. Шүүх ажиллагаа үргэлжилж байна.
Forbes-ийн тооцоогоор 4.7 тэрбум ам.долларын хөрөнгөтэй Петр Авен нь Украин гаралтай Оросын тэрбумтан Михаил Фридмантай бизнесийн нягт харилцаатай юм. Тэд Орос, Украины дайн эхэлснээс хойш өмч хөрөнгийн асуудлаар барууны орнуудын шүүхэд хамгийн их маргаан үүсгэж буй олигархууд билээ.
Эх сурвалж: Fortune