ХБНГУ-ын автомашин үйлдвэрлэгч Wolksvagen группд харьяалагддаг спорт автомашины Porsche брэнд өөрийн хувьцаагаа олон нийтэд хамгийн өндрөөр буюу нэгж хувьцааг 82.5 еврогоор санал болгохоор болжээ.
Wall Street Journal сонины орон нутгийн цагаар 28-ны мэдээлснээр, Volkswagen групп Porsche-г Германы хөрөнгийн зах зээлд гаргахаас ердөө нэг өдрийн өмнө уг шийдвэрийг гаргасан болохыг онцлов.
Дэлхий даяар эдийн засгийн уналтад орох түгшүүр нэмэгдэж байгаа энэ үед компанийн зүгээс Porsche-д хэр итгэл хүлээлгэж байгааг харж болохоор байна хэмээн Wall Street Journal сонин дүгнэжээ.
Ингэснээр Porsche-ийн зах зээлийн үнэлгээ нь хөрөнгийн биржид гарсны дараа 75 тэрбум еврод хүрэх төлөвтэй байгаа аж. Улмаар 56 тэрбум ам.долларын зах зээлийн үнэлгээтэй Mercedes-Benz компанийг ардаа орхин автомашин үйлдвэрлэгчид дундаа зах зээлийн үнэлгээгээр эхний тав дугаарт эрэмбэлэгдэх юм.
Түүнчлэн 2011 онд Швейцарийн уул уурхайн Glencore компани Лондонгийн хөрөнгийн биржид бүртгүүлснээс хойших Европ дахь хамгийн том компани болох төлөвтэй байна.
Зах зээлийн тогтворгүй байдал, янз бүрийн хүчин зүйлээс болж үйлдвэрлэл буурч буй зэргээс шалтгаалан хөрөнгийн зах зээл уналтад ороод буй энэ үед Porsche ийнхүү олон нийтэд хувьцаагаа санал болгож буй нь ихээхэн анхаарал татаж байгаа юм.
Тансаг зэрэглэлийн спорт автомашины Porsche брэнд энэ оны эхний хагаст үйл ажиллагааны ашиг нь 22 хувиар өссөн бол Volkswagen компанийх 8 хувиар буурсан билээ.
Porsche нь орон нутгийн цагаар 29-ний өдөр Франкфуртын хөрөнгийн биржид бүртгэлтэй болох аж.
Эх сурвалж: Newsis