Филиппин 175 оффшор мөрийтэй тоглоомын компанийг хаах гэж байна. Улмаар тэдгээрт ажиллаж буй 40,000 гаруй хятад ажилтан нутаг буцах тооцоо гарчээ. Тус улсад далд хэлбэрээр ажилладаг онлайн мөрийтэй тоглоомын салбарыг таслан зогсоох арга хэмжээ үргэлжилж байна.
Филиппинд 2016 оноос далд онлайн мөрийтэй тоглоомын салбар цэцэглэж эхэлсэн. Учир нь мөрийтэй тоглоомыг хатуу хориглодог Хятад улсын хэрэглэгчдийг татах зорилготой байгууллагууд мөрийтэй тоглоомын харьцангуй либерал хуультай Филиппинд байрлах тохиолдол элбэг байсан. Филлипиний онлайн мөрийтэй тоглоомын бизнес эрхлэгчид буюу POGO хэмээн нэрлэдэг бүлэг бизнес нь оргил үедээ 300,000 гаруй хятад ажилтан авч ирж ажиллуулж байв. Гэвч төрөөс татвараа өсгөхийн зэрэгцээ ковидын хол хорионы улмаас зарим нь бусад орон руу шилжсэн юм.
Филиппиний Шударга ёсны яамны хэвлэлийн төлөөлөгч Доминик Славано “Тус салбартай холбоотой хятад үндэстнүүд хятадуудыгаа хулгайлах, амь насыг нь бүрэлгэх зэрэг олон төрлийн онц ноцтой гэмт хэрэг гарч байгаа тул бид салбарыг бүхэлд нь хязгаарлах арга хэмжээ эрчтэй авч байна” хэмээн өгүүллээ. Хаах шийдвэрт багтсан POGO нар нь бүгд лицензийн ямар нэг зөрчилтэй, татвар зэрэг төлбөрийн ямар нэг асуудалтай байгууллагууд байгаа юм. Хаагдсан газруудын хятад ажилчдыг ирэх сараас нутаг буцааж эхэлнэ.
POGO нараас татсан хураамжийн орлого 2020 онд 7.2 тэрбум песо, 2021 онд 3.9 тэрбум песо хүрсэн гэж Филиппиний Сангийн яамнаас мэдэгдлээ. Харин татварын дүнг мэдээлсэнгүй. Манила дахь Бээжингийн элчний газар тус ажиллагааг дэмжин хамтран ажиллаж байна.
POGO нар бүгд Филиппинийг орхин гарсан тохиолдолд 1 гаруй сая ам метр оффисын талбай суларч, тэдгээрийн жил тутмын түрээсийн орлого болох 8.9 тэрбум песо тасарна хэмээн Leechiu үл хөдлөх хөрөнгийн газар тооцжээ. Тэрчлэн, тус салбарт 201,000 хятад иргэн, 111,000 филиппин иргэн ажилладаг тооцоо бий. POGO нь Филиппиний эдийн засагт нэг жилд 190 тэрбум песо буюу 3.22 тэрбум ам.долларын ашгийг үл хөдлөх хөрөнгө болон жижиглэн худалдааны салбарт голчлон оруулдаг ажээ.
Эх сурвалж: Reuters