Италийн эрчим хүчний салбарын тэргүүлэгч Eni компани ОХУ-ын төрийн өмчит эрчим хүчний Газпром компаниас 3 хоногийн турш байгалийн хий хүлээн аваагүй талаар гадаадын томоохон хэвлэлүүд орон нутгийн цагар 2-ны өдөр мэдээлэв. ОХУ-ын зүгээс Австрийн талын шинэ зохицуулалтыг үүнд буруутгаж байгаа аж.
Тус мэдээнд дурдсанаар Италийн эрчим хүчний компаниуд дундаас Оросын байгалийн хийн хамгийн том импортлогч болох Eni компани энэ сарын 1-ний өдрөөс өнөөдрийг хүртэл хий хүлээн аваагүй гээд нийлүүлэлтийн тасалдал 4-ний өдрийг хүртэл үргэлжлэх төлөвтэй байгаа гэв.
Газпром компани Telegram платформоор дамжуулан мэдэгдэл хийхдээ Австри улс шинэчлэн зохицуулалт хийсний улмаас асуудал үүссэн гэж мэдэгджээ. Австрийн эрх баригчид саяхан өөрчлөгдсөн нийлүүлэлтийн гэрээнд Газпром компанийг гарын үсэг зурах ёстой гэж тайлбарласан ч тус компани биелүүлээгүй гэх шалтгаанаар энэхүү асуудал үүссэн байна. Гэвч Австри улс Газпром компаниас хий хүлээн авсаар байгааг Eni онцолсон бөгөөд Австрийн эрчим хүчний OMV компани ч эрэлт нийлүүлэлтэд асуудал байхгүй гэж мэдэгдэв.
Италиар тогтохгүй Европ тивд хүйтний улирал эхэлсэнтэй холбогдуулан эрчим хүчний эрэлт ихсэн цахилгааны зардал нэмэгдэж байгаа, ОХУ-аас нийлүүлэлт тасрах аюул улам бүр нэмэгдэж байгаагаас үүдэн эрчим хүчний аюулгүй байдалд санаа зовохоос аргагүйд хүрээд байна. Ялангуяа сүүлийн өдрүүдэд “Умардын урсгал-1”, “Умардын урсгал-2”-ын далай доорх хоолойгоос хий алдагдсан явдал нь нөхцөл байдлыг улам дордуулсан билээ.
Итали улсын хувьд хийн импортынхоо 40 гаруй хувийг ОХУ-аас авдаг байсан ч сүүлийн үед энэ хэмжээ 10 орчим хувь болж буурсан байна. Өнгөрсөн сарын сүүлээр гаргасан 2-р улирлын бизнесийн тайланд Eni компани Алжир, Египет, Конго зэрэг Африкийн орнуудтай байгалийн хий нийлүүлэлтийн шинэ гэрээг үзэглээд байгаа ба ОХУ-аас жил бүр авдаг байгалийн хийн хэмжээг (20 тэрбум м3) 2025 он гэхэд бүрэн орлуулахаар төлөвлөж байгаа аж.
Эх сурвалж: Asiae