Их Британийн харилцаа холбооны салбарт гурав ба дөрөвдүгээрт бичигддэг Vodafone болон Three компаниуд нэгдэх гэж байна. Тус нэгтгэлийн үр дүнд өдгөө зах зээлд тэргүүлж буй BT, EE, Virgin Media компаниудаас илүү том компани үүсэх болно. Харилцагчдын тоо нэгдэж 27 саяд хүрнэ.
Компани нэгтгэлийн хэлцлийг Их Британийн Өрсөлдөөн, зах зээлийн газар хянаж үздэг бөгөөд тэд шийдвэрээ хараахан гаргаагүй байна. Гэвч энэ он дуусахаас өмнө нэгтгэлийн гэрээ эцэслэнэ гэж найдаж байгаа юм. Одоогийн байдлаар шинээр үүсэх компанийн 51 хувийг Vodafone компани, үлдсэн 49 хувийг Three-ийн толгой компани Hutchison эзэмшихээр ярилцаж байна.
Төрийн зохицуулах байгууллагууд Британи дахь өрсөлдөөн буурахыг эсэргүүцсэн өнгө аястай байсан. Гэвч харилцаа холбооны зохицуулах байгууллага Ofcom-ийн хандлага зөвшөөрөх талтай байгаа тухай Vodafone мэдээллээ. Учир нь дээрх хоёр компанийн сүүлийн жилүүдийн хөрөнгө оруулалтын өгөөж зардлаа давж чадахгүй байгаа юм. Тэрчлэн, компаниуд нэгдсэний дараа ч туулах бэрхшээл мундахгүй олон болохыг Assembly харилцаа холбооны зах зээл судалгааны байгууллага мэдэгдлээ.
Харин CCS Insight судалгааны байгууллагаас “Тус компаниуд нэгдэх сонирхолтой байгаагаа нууцалж байгаагүй. Тэд хүчээ нэгтгэх болсон гол сэдэл нь цар хүрээ юм. Органик өсөлтөөр зах зээлд тэргүүлэх боломж маш бага” гэв. Компаниуд нэгдсэнээр 5G үйлчилгээг Их Британид бүрэн нэвтрүүлэх үйл явц хурдасна гэж үзэж болно.
Их Британийн харилцаа холбооны салбарт үйл ажиллагаа эрхэлдэг бусад компани болох Virgin Media O2, TalkTalk, Sky нар бүтцийн өөрчлөлттэй холбоотой хэлэлцээр эхлүүлсэн сураг байна. Zangia News тухай бүрд мэдээлэх болно.
Эх сурвалж: BBC