ОХУ-ын төрийн мэдэлд байдаг "Газпром" компанийн хувьцаа эзэмшигчдийн ээлжит бус хуралдаан Баасан гарагт болсон. Хурлын шийдвэрээр "Газпром"-ийн тайлант хугацаанаас өмнө ногдол ашиг хуваарилахыг дэмжлээ.

Улмаар эзэмшигчид нэгж хувьцаанд 51.03 рубль буюу 0.89 ам.доллар хуваарилан тараахаар боллоо. Нэгдсэн дүнгээр 1.208 их наяд рубль буюу 21 тэрбум ам.доллар болж буй тус ногдол ашиг нь ОХУ-ын корпорацын түүхэн дэх хамгийн өндөр дүнтэй гэдгээрээ онцлог юм. Энэхүү мэдэгдлийн дараа "Газпром"-ын хувьцааны ханш 5 орчим хувиар өслөө.

"Газпром"-ын хувьцаа эзэмшигчид өнгөрсөн оны тайлант ашгаас ногдол ашиг хуваарилахгүй байх гэнэтийн шийдвэрийг зургаадугаар сард гаргасан билээ. Тус компани 1998 оноос хойш тогтмол ногдол ашиг тарааж байсан юм. Харин 2022 оны эхний хагас жилийн ашгаас хуваарилах энэ удаагийн ногдол ашиг нь Барууныхны хоригт өртөж буй жижиглэн хөрөнгө оруулагчдын хувьд таатай мэдээ болж байна.

Эх сурвалж: Reuters