Даваа гарагт Дойче Велле сувгаас мэдээлснээр ХБНГУ-д цахилгаан халаагуурын борлуулалт эрс өсжээ.

Улмаар энэ он гарснаас хойш тус улсад нийт 985000 ширхэг цахилгаан халаагуур борлуулагдсан байна. Энэ нь өнгөрөгч оны мөн үетэй харьцуулахад даруй 76 хувиар өссөн үзүүлэлт ажээ.

Дойче Велле сувгаас тайлбарлаж байгаагаар Герман, Их Британи, Франц, Испани, Итали гэх улсуудад борлуулагдсан цахилгаан халаагуурын нийт тоо ширхгийг авч үзвэл өнгөрөгч оны мөн үеэс 5.1 хувиар бага гарсан ч германчууд “паник” худалдан авалт хийж байгаагаас үүдэн борлуулалт нэмэгдэж байгаа юм. Тэдний энэ тайлбарыг GfK зах зээлийн судалгааны байгууллагаас баталсан бөгөөд жижиглэн худалдааны дэлгүүрүүд ч баталж байгаа ажээ.

Үйл явдлын хүрээнд ХБНГУ-ын Эрчим хүч, Усны менежментийн холбооноос хэлснээр цахилгаан халаагуур өргөнөөр ашиглах нь цахилгаан сүлжээг хэт их ачаалуулж, цахилгаан тасалдахад хүргэж болзошгүй гэсэн байна. Тэдний баталж байгаагаар хэрэв ХБНГУ-д байгалийн хий хомствол айл өрхүүдийг эрчим хүчээр хангах нь нэн тэргүүний асуудал байх болно гэжээ.

Эх сурвалж: DW