Өнгөрөгч долоо хоногт Францын Парис хотноо загварын долоо хоног тохиож, олон брэнд, олон ч алдартнууд нэг дор цугласан билээ.
Гэхдээ Парисын загварын долоо хоногийн онцлох мөч Coperni брэндийн 2023 оны хавар-зуны загварын шоуны үеэр тохиожээ. Тодруулбал, тус шоуны үеэр алдарт загвар өмсөгч Белла Хадид тайзан дээр хагас нүцгэн гарч ирэхэд хоёр шинжлэх ухаанч түүн рүү шингэн будаг цацан “хувцаслаж” эхэлсэн байна.
Тийнхүү зочид бараг 10 минут хэртэй үргэлжлэх үзүүлбэрийг үзэж, Coperni брэндийн даашинз хэрхэн бүтэж буйг ойроос харжээ.
Тус брэндийг үүсгэн байгуулагчдын нэг, бүтээлч ажиллагаа хариуцсан захирал Себастиен Мейерийн хэлснээр, “Энэ даашинзыг өмсөж, даашинз чигт нь хадгалж, өлгүүрт өлгөж ч болно. Харин даашинз таалагдахгүй бол буцаан шингэн хэлбэрт оруулаад шүршиж, өөр даашинз урлаж ч болно” гэсэн юм.
Энэхүү дэвшилтэт материалыг 2000 эхнээс хөгжүүлж эхэлсэн бөгөөд байгалийн гаралтай болон нийлэг полимерыг шингэн уусмалд холин гаргаж авдаг байна. Улмаар шингэн уусмал бүхий материалыг шүршихэд гадаргуун дээр очоод биежиж хатдаг юм.
Coperni брэндийн зүгээс энэ төрлийн материалаар хийсэн даашинзаа худалдаанд гаргахгүй гэдгээ мэдэгдсэн ч дээрх үзүүлбэрийг үзүүлсэн шалтгаан нь технологи хийгээд загварын дундах заагийг ойртуулах байсан хэмээжээ.
Эх сурвалж: CNN