Мягмар гарагт Оросын эрчим хүчний Газпром компаниас мэдэгдсэнээр тэд энэ сарын 20-ны өдрөөс эхлэн Молдова улсад байгалийн хий нийлүүлэхээ бүрэн зогсоож магадгүй нөхцөл үүсжээ.
Учир нь тэдний зүгээс Молдова улсыг гэрээнд заасан дагуу төлбөрөө төлж барагдуулаагүй гэж үзсэн байна. Улмаар Газпромын талаас гэрээнд заасан бүрэн эрхийн дагуу нийлүүлсэн байгалийн хийн төлбөрөө хүлээн аваагүй тохиолдолд нийлүүлэлтээ зогсоох бүрэн эрхтэй юм.
ТАСС мэдээллийн агентлагаас мэдээлж байгаагаар Молдовагаз компани 2022 онд байгалийн хийн төлбөрөө төлж барагдуулах асуудлын хүрээнд гэрээгээр хүлээсэн үүргээ удаа дараа биелүүлээгүй бөгөөд гэрээгээр хүлээсэн үүргээ зөөлрүүлэх асуудлаар Газпром компанид олон ч удаа ханджээ. Тийнхүү Газпромын зүгээс тэдний хүсэлтийг тогтмол харгалзан үзэж, биелүүлж ирсэн ч Молдовагазын талаас гэрээгээр хүлээсэн үүргээ хангалттай биелүүлэхгүй байгаа гэнэ.
Эх сурвалж: ТАСС