Ухаалаг гар утаснаас автомашин хүртэл төрөл бүрийн бүтээгдэхүүнд ашигладаг чипний эрэлт сүүлийн жилүүдэд эрс өсөж байхад нийлүүлэлт сүүлийн хоёр жил ихээхэн тасалдлаа. Италийн засгийн газар тус асуудлыг шийдвэрлэх хүрээнд STMicroelectronics компанид төсвөөс 292.5 сая еврогийн дэмжлэг үзүүлэн чипний хавтангийн үйлдвэр байгуулахаар шийджээ. Харин STMicroelectronics 730 сая евро төсөвлөөд байна.
SiC хавтан буюу цахиурын карбид хавтан бол хагас дамжуулагч чипний үндсэн эд анги бөгөөд гар утас, цахилгаан бараа, автомашин зэрэг бүх төрлийн цахилгаан болон электрон бүтээгдэхүүнд ашигладаг, чип үйлдвэрлэлийн эхний дамжлагад байдаг эд анги юм.
Сицилийн арал дээр байрлах тус үйлдвэрийн барилга, угсралтын ажил ирэх онд эхлэн 2026 онд дуусна. Улмаар 700 орчим ажлын байр шинээр нэмэх болно. Өрсөлдөгч Intel компани Италид мөн адил том хэмжээний чипний үйлдвэр байгуулахаар хэлэлцэж байна.
Эх сурвалж: Reuters