Пүрэв гарагт АНУ-ын ерөнхийлөгч Жо Байден марихуаны хэрэглээ, худалдааны бодлогод томоохон өөрчлөлт хийжээ. Улмаар ерөнхийлөгчийн зүгээс марихуантай холбоотой хөнгөн зэргийн гэмт хэрэг үйлдсэн этгээдүүдийг өршөөх захирамж ч гаргасан байна.
Тийнхүү захирамж гарсан даруй АНУ-д бүртгэлтэй марихуан тариалагч, худалдагч байгууллагуудын хувьцааны үнэлгээ эрчимтэй өсжээ.
Тодруулбал, АНУ-д бүртгэлтэй, марихуаны томоохон борлуулагч Tilray Brands болон Canopy Growth Corp гэх хоёр компанийн хувьцааны үнэлгээ даруй 22 болон 31 хувиар өссөн байна.
Марихуан тариалагч, худалдагч байгууллагуудын хувьцаа хамгийн сүүлд 2018 онд ийн эрс өсөж байсан ч тус салбар дахь байгууллагууд хөрөнгө оруулагч нарын хүлээж байсан шиг хангалттай хурдан өргөжөөгүйгээс үүдэн хувьцааны үнэлгээ нь эргэн буурч байжээ.
Одоогийн байдлаар марихуан нь героин, LSD зэрэг мансууруулах бодистой нэг ангилалд бичигдэж байгаа бөгөөд ерөнхийлөгчийн зүгээс холбогдох албаныханд марихуан ямар ангилалд багтахыг дахин нягтлахыг даалгажээ.
Эх сурвалж: AP News