АНУ-ын цахилгаан автомашин үйлдвэрлэгч гарааны компани болох Rivian жолооны системийн асуудлаас болж 12,000 орчим автомашинаа эргүүлэн татахаа мэдэгдлээ.

Ассошиэйтед Пресс агентлагийн орон нутгийн цагаар 8-ны өдөр мэдээлснээр, Rivian өмнөх өдөр нь үйлчлүүлэгчдэдээ илгээсэн захидалдаа "Бид зарим тээврийн хэрэгслийн жолооны системийн хэд хэдэн эд ангиудыг хангалттай чангалаагүй байж болзошгүй асуудал илэрсэн. Үүний тулд яаралтай эргүүлэн татах арга хэмжээ авах шаардлага тулгарлаа” хэмээн цохон тэмдэглэсэн байна.

Үндэсний замын хөдөлгөөний аюулгүй байдлын албаны (NHTSA) зүгээс мэдээлснээр энэ удаад тус компани нь цахилгаан хөдөлгүүрт pickup, van болон SUV ангиллын нийт 12,212 тооны автомашиныг эргүүлэн татахаар болсон тухай онцолжээ. Тээврийн хэрэгслийн урд талын жолооны системийн түдгэлзүүлэх тэмдэглэгээ хангалттай чангараагүйн улмаас осолд хүргэж магадгүй хэмээн үзэж ийнхүү эргүүлэн татахаар болсон аж.

Одоогоор долоон сэжигтэй тохиолдол илэрсэн ч энэ асуудлын улмаас хэн нэгэн гэмтэж бэртсэн тохиолдол гараагүй гэж тус компанийнхан тайлбарлав. Харин автомашины урд хэсэгт хэвийн бус дуу чимээ, чичиргээ үүсвэл яаралтай засварлах шаардлагатай бөгөөд хэрэглэгчдээс ямар ч зардал гарахгүй гэдгийг компанийн албаны хүн мэдэгджээ.

Тус компани энэ он гарсаар гурав дахь удаагаа бүтээгдэхүүнээ эргүүлэн татаж буй юм. Тодруулбал өнгөрөгч 8-р сард 500 орчим машиныг аюулгүйн дэрний асуудлаас болж эргүүлэн татаж байсан бол өнгөрөгч 5-р сард хамгаалалтын бүсний зангууны асуудлаас болж 200 орчим автомашиныг мөн эргүүлэн татаж байв.

Эх сурвалж: Asiae