Эмнэлгийн хэрэгсэл үйлдвэрлэгч Becton Dickinson компанийн зарим нэр төрлийн ариутгалын төхөөрөмж мэс заслын багажийг хангалттай хэмжээнд ариутгахгүй байгааг тогтоосон тул зах зээлээс эргүүлэн татаж байна.
Becton Dickinson компанийн Genesis Sterrad брэнд нэрээр худалдаанд гардаг мэс заслын багаж хэрэгсэл ариутгагч сав гэмтэлтэй байж болзошгүйг нотлох баримт олдсон аж. Энэхүү дахин ашиглах боломжтой ариутгагч металл савны 17 хувилбар нь аэрозолын сорилт хэмээх чанарын туршилтын шаардлагыг тогтмол хэмжээнд хангахгүй байна. Улмаар мэс заслын өвчтөн халдвар авах эрсдэлтэй хэмээн тус компаниас сайн дурын үндсэн дээр мэдээлэл өглөө. Өвчтөн халдвар авсан тохиолдолд халуурах, жихүүдэс төрөх, буглаа, сепсис үүсэх магадлалтай юм. Тиймээс нийт 8,075 ариутгагч төхөөрөмж эргүүлэн татаж буй бөгөөд тэдгээрийн 6,777 нь АНУ-ын нутаг дэвсгэр дээр байгаа ажээ. Одоогоор тус ариутгагчийн улмаас ямар нэг хохирол учирсан тухай гомдол, санал ирээгүй гэж Америкийн Хүнс, эмийн удирдах газраас мэдэгдлээ.
Эх сурвалж: Business Insider