Apple өнгөрсөн сар худалдаанд гарсан IPhone 14 загварын гар утсанд гэнэтийн осол, автомашины аваар илрүүлэх шинэ функц нэмсэн билээ.
Тус функц нь хэрэглэгчийг автомашины осолд орсон тохиолдолд цагдаа, түргэн тусламжийн 911 дугаарт автоматаар залгагдах тохируулгатай юм. Улмаар ослын байршлыг мэдээлсэн аудио мессеж очдог ажээ. Гэтэл цэнгэлдэх хүрээлэнгийн галзуу хулгана зэрэг хурдтай тоглоомууд дээр iPhone 14 хэрэглэгчид өөрсдөө мэдэлгүй цагдаад дуудлага өгөх тохиолдол олон гарах болов.
Тодруулбал, Apple-ийн шинэ гар утсан дахь гироскоп мэдрэгч болон хурдатгал хэмжигч төхөөрөмжүүд нь автомашины ослын үеийн хэмжээс үзүүлэлтэд хүрсэн тохиолдолд анхааруулах чимээ өгнө. Түүнийг хэрэглэгч 20 секундийн дотор идэвхгүй болгоогүй нөхцөлд 911 дугаарт автоматаар дуудлага өгч түргэн тусламжийн төвд мэдээлдэг ажээ. Хэдийгээр “хуурамч” дуудлага олон өгч байгаа боловч тус функц саяхан Небраскад гарсан ослын талаар амжилттай мэдээлсэн. Apple-ийн зүгээс хэрэглэгчдээ цэнгэлдэх хүрээлэнгийн тоглоомд суухаасаа өмнө тус тохируулгыг унтрааж байхыг одоогоор сануулаад байна.
Эх сурвалж: The Verge