АНУ мөргөлдөөнийг уртасгах зорилгоор Украинд зэвсэг нийлүүлж байгаа нь эцсийн дүндээ Украинд илүү их хохирол учруулах болно гэж Оросын тал онцолсон байна.
Кремлийн хэвлэлийн төлөөлөгч Дмитрий Песков "АНУ-ын засаг захиргаа болон армийн зүгээс Украинд байнга зэвсэг нийлүүлж, мөргөлдөөнийг өргөжүүлж байгааг бид харсаар байна. Энэ нь эцэстээ Украинд л зовлонтой нөхцөл байдалыг бий болгох болно" гэж мэдэгджээ.
"АНУ-ын зэвсгийн дэмжлэг нь Украин дахь "цэргийн тусгай ажиллагааны" зорилгод огт нөлөөлөхгүй" гэж тэр нэмж хэлэв.
Оросын эх газар болон Крымийн хойгийг холбодог цорын ганц гүүр болох Керчийн хоолойн гүүрэн дээр өнгөрөгч 8-ны өдөр томоохон дэлбэрэлт болсонд ОХУ-ын тал Украиныг буруутган даваа гарагт Украины хотууд руу олон тооны далавчит пуужингийн цохилт өгөн хариу арга хэмжээ авч буйг АНУ-ын ерөнхийлөгч Жо Байден зэмлэн буруушааж, тус улсад агаарын довтолгооноос хамгаалах дэвшилтэт системүүдийг үргэлжлүүлэн нийлүүлэхээ орон нутгийн цагаар 10-ны өдөр мэдэгдээд байгаа билээ.
Эх сурвалж: SBS