Иенийн ханш зогсолтгүй буурсаар сүүлийн 24 жилд анх удаа 1 ам.доллар 146 иенийг давжээ.
Японы NHK зэрэг хэвлэлүүд өнөө өглөө Токиогийн валютын захад иенийн ам.доллартай харьцах ханш 1998 оны наймдугаар сараас хойш анх удаа 146 иенийг давсан тухай мэдээлсэн байна.
Иений ханш ийнхүү унаж буй нь АНУ-ын Холбооны нөөцийн сан бодлогын хүүгээ дахин багагүй хэмжээгээр өсгөх таамаг олон улсад үүсээд буйтай шууд холбоотой юм.
АНУ, Японы зээлийн хүүгийн зөрүү ихсэх тусам иен зарж, ам.долларт хөрөнгө оруулах тохиолдол их байгаа бөгөөд иенийн ханш цаашид ч сулрах төлөвтэй байгаа аж.
Өнгөрсөн сарын 22-ны өдөр иенийн ам.доллартай харьцах ханш 145-ыг давахад Японы засгийн газар, Японы Төв банк 3 их наяд иен буюу 20.9 тэрбум ам.доллароор интервенц хийж ам.доллар зарж, иен худалдаж авсан ч энэ нь ханшийг хамгаалахад төдийлөн үр дүнгүй, түр зуурын арга хэмжээ болсон нь харагдаж байна.
Иймээс тус улсын засгийн газар болон Төв банк цаашид зах зээлд дахин интервенц хийх эсэх тал дээр болгоомжлонгуй хандаж байгааг салбарын шинжээчдээс иш татан NHK суваг мэдээлэв.
Эх сурвалж: YTN