Америкийн ардчилсан намын гишүүд Техас мужийн эрчим хүчний сүлжээ эмзэг байдалд орсон өнөө үед крипто олборлогчид хэт их эрчим хүч ашиглаж байгаа нь анхаарах асуудал мөн гэж үзэв. Улмаар энэ хүрээнд сенатор Элизабет Уоррен Ардчилсан намын бусад зургаан гишүүний хамт Лхагва гарагт Техас мужийн эрчим хүчний удирдах газруудад албан захидал хүргүүлжээ.
Техасын эрчим хүчний найдвартай байдлын зөвлөл хэмээх төрийн байгууллагад ирүүлсэн захидалд Техас мужид крипто олборлолтын үйл ажиллагаанд сүүлийн зургаан жилийн хугацаанд хэр их эрчим хүч зарцуулсан, хэр их хэмжээний нүүрстөрөгчийн давхар исэл ялгаруулсан зэрэг дэлгэрэнгүй мэдээлэл гаргаж өгөхийг шаардсан байна.
Сенатор Уоррен “Би криптогийн эдийн засаг, байгаль орчинд учруулж буй эрсдэлийг олон нийтэд ойлгуулахын тулд сүүлийн нэг жилийн хугацаанд идэвхтэй ажиллаж байна. Крипто олборлогчдын ашиглаж буй эрчим хүчний хэмжээ нь зарим нэг бүхэл бүтэн улс эсвэл мужийн хэрэглээтэй ойролцоо байдаг. Тэдний хэрэглэж буй эрчим хүчинд татвар төлөгчдийн мөнгөнөөс татаас хэлбэрээр олгох ёсгүй” хэмээн ярилаа. Тэрбээр эрчим хүчний сүлжээ сүйрлийн ирмэг дээр байгаа одоо үед ганц Техас муж төдийгүй бусад аль ч бүс нутагт крипто олборлогчдыг дэмжихгүй байх нь зүйтэй гэж үзэж байна.
Эх сурвалж: The Verge