Хятад улс Бразилаас эрдэнэ шиш импортлохоор болжээ. Учир нь АНУ-аас асар их хамааралтай байсан эрдэнэ шишийн импортын хараат байдлаа бууруулахын сацуу Украины эрдэнэ шишийг орлуулахаар зорьж буй хэрэг аж. Хятад улс нь эрдэнэ шиш, шар буурцаг зэрэг голлох үр тарианы хувьд АНУ-аас хараат байдлаа бууруулахын тулд Бразилын тариалангийн салбарт үйл ажиллагааа явуулаад багагүй олон жилийн нүүрийг үзээд байгаа билээ.
Bloomberg cувгийн 13-ны өдөр мэдээлснээр, Cargill, Bungie зэрэг үр тарианы салбарын томоохон компаниудын Бразилд үйл ажиллагаа явуулдаг 45 орчим агуулах Хятад руу эрдэнэ шиш экспортлох урьдчилсан зөвшөөрөл авсан байна. Эх сурвалжийн мэдээлснээр Бразил улс ирэх 12-р сараас эхлэн Хятад руу эрдэнэ шишийг тээвэрлэж эхлэх төлөвтэй байгаа аж. Түүнчлэн цаашид Хятад руу бүтээгдэхүүн нийлүүлэх компаниудын тоо ч нэмэгдэх гэнэ.
Хятад улс нь өнгөрсөн онд эрдэнэ шишний жилийн хэрэглээ болох 390 сая тонны 9.4 хувь буюу 28.45 сая тонныг 8 тэрбум ам.доллароор импортолсон байна. Үүний 5,6 тэрбум ам.доллар нь АНУ-ын бүтээгдэхүүн байсан бол Украинаас 2,3 тэрбум ам.доллароор хэмжигдэх эрдэнэ шишийг импортолж байжээ. Ам.долларын ханш зогсолтгүй чангарахын хэрээр АНУ-ын эрдэнэ шишийн үнэ ч тэнгэрт хадаж орлуулах шаардлага мөн тулгарсан гэж Bloomberg суваг цохон тэмдэглэв. Бразил бол эрдэнэ шишийн экспортоор дэлхийд “аман хүзүүнд” эрэмблэгддэг орон хэдий ч Хятад улс эрүүл ахуйн шаардлагаас үүдэн Бразилийн бүтээгдэхүүнийг есөн жилийн турш импортолоогүй юм. Гэвч өнгөрсөн тавдугаар сараас хойш хоёр улсын Засгийн газар импортоо сэргээх ажлыг эхлүүлсэн билээ.
Хятад улсын хувьд хүнсний гол нэрийн бүтээгдэхүүн болох шар буурцаг (85%) болон эрдэнэ шиш нь импортоос ихээхэн хамааралтай. Учир нь гахайн махны тэжээлийн хэрэгцээ маш өндөр байдаг аж. Өнгөрсөн онд тус улс нь 31.3 тэрбум ам.долларын шар буурцгийг Бразилаас импортолж байсан бол АНУ-аас 16.9 тэрбум ам.долларын бүтээгдэхүүн импортолж байжээ.
Хятад улс нь АНУ болон тус улсын хооронд худалдааны дайн ид өрнөж буй энэ үед Бразилиас эрдэнэ шиш импортлохоор болж байгаа нь АНУ-ыг цочирдуулах зорилготой гэж шинжээчид үзэж байна. Түүнчлэн Бразилд үйл ажиллагаа явуулдаг Хятадын компаниуд тун амжилттай ажиллаж буйн илрэл гэж ойлгож болох юм.
Эх сурвалж: Hankyung