Польшийн газрын тос дамжуулах хоолойн оператор PERN компанийн зүгээс газрын тос асгарч буй нь илэрсэн ОХУ, Европыг холбосон “Дружба” хоолойд засвар хийж үйл ажиллагааг хэвийн болгосноо мэдэгдлээ.
Ассошиэйтед Пресс агентлагийн орон нутгийн цагаар 15-ны мэдээлснээр, тус хоолойгоос газрын тос алдагдаж байсан гэмтлийг зассаны ачаар одоо газрын тос нийлүүлэх үйл ажиллагаа хэвийн үргэлжилж байгааг PERN компани цохон тэмдэглэв.
Гэвч газрын тос алдагдсан шалтгааныг одоо хэр нь олж тогтоогоогүй байгаа бөгөөд шалтгааныг тогтоохоор ажиллаж байгаа аж.
“Дружба” хоолой нь 1960-аад онд баригдсан бөгөөд Оросын зүүн нутгаас Унгар, Словак, Чех, Польш, Герман зэрэг Зүүн Европ руу газрын тос нийлүүлдэг дэлхийн хамгийн том дамжуулах хоолойн нэг юм.
Болсон үйл явдлыг эргэн сануулвал өнгөрөгч 12-ны өдөр тус хоолойгоос газрын тос асгарч буй нь илэрсэн билээ. Түүнчлэн өнгөрсөн сарын сүүлчээр Оросоос Герман руу чиглэсэн байгалийн хийн “Умардын урсгал 1” хоолойд дэлбэрэлт болж дөрвөн ч хэсгээс их хэмжээний хий алдагдсан тохиолдол гарсан талаар бид өмнө нь мэдээлж байсан билээ.
Эх сурвалж: Newsis